ວັດເພຍວັດແຫ່ງເມືອງຄູນ ອະດີດເມືອງເອກແຫ່ງຊຽງຂວາງ

  ວັດເພຍວັດແຫ່ງເມືອງຄູນ ອະດີດເມືອງເອກແຫ່ງຊຽງຂວາງ

 

ຫ່າງຈາກເມືອງຫຼັກເມືອງໂພນສະຫວັນ ແຂວງຊຽງຂວາງ ປະມານ 32 ກິໂລແມັດ ເປັນທີ່ຕັ້ງຂອງວັດເພຍວັດ  ວັດແຫ່ງນີ້ຖືກສ້າງຂຶ້ນໃນສະຕະວັດທີ 14 ຢູ່ກາງເມືອງຄູນ ໃກ້ໆກັບທາດຝຸ່ນ ແລະ ທາດຈອມເພັດ 

 

ວັດແຫ່ງນີ້ມີຮູບປັ້ນພຣະພຸດທະຮູບຂະໜາດໃຫຍ່, ພຣະອົງຕື້ ແລະ ເສດຊາກຂອງເສົາສິມເປັນຮ່ອງຮອຍຄວາມສະຫງ່າຂອງວັດເພຍວັດ

ເຊິ່ງໃນຊ່ວງສະຕະວັດທີ 19 ວັດເພຍວັດໄດ້ຖືກໂຈນປຸ້ນສະດົມ ແລະ ຖືກທຳລາຍຢ່າງໜັກ ທີ່ເຂົ້າມາບຸກລຸກຊອກຫາວັດຖຸທີ່ມີຄ່າ

ໃນປີ 1953 ຈາກສົງຄາມອິນດູຈີນຄັ້ງທີ I ນັ້ນໄດ້ສົ່ງຜົນໃຫ້ພຣະພຸດທະຮູບໃຫຍ່ໄດ້ຖືກທຳລາຍ ເຊິ່ງໃນປີຕໍ່ມາປະຊາຊົນຈຶ່ງໄດ້ສ້າງວັດຄືນໃໝ່ ແລະ ມາຮອດໄລຍະສົງຄາມອິນດູຈີນຄັ້ງທີ II, ຕຶກອາຄານໄດ້ຖືກລະເບີດທຳລາຍຢ່າງໜັກ ຍັງຄົງເຫຼືອໄວ້ແຕ່ພຣະພຸດທະຮູບ, ເສົາຂອງສິມ ແລະ ຝາຈຳນວນໜຶ່ງດັ່ງທີ່ເຮົາເຫັນຮູບນັ້ນ

ໃນສ່ວນຂອງສິລະປະ ແລະ ສະຖາປັດຕະຍະກຳຂອງວັດເພຍວັດນັ້ນ ຕົວຂອງສິມວັດແຕ່ກ່ອນຈະມີ 8 ເສົາຫຼັກທີ່ຄຳ້ຊູຫຼັງຄາທີ່ມຸງສິມ ທີ່ມີຊໍ່ດອກບົວຕົບແຕ່ງຂ້າງເທິງ ມີລວດລາຍດອກກີບທັງໝົດ ລວມທັງດອກໄມ້ກຳລັງບານ ແລະ ກີບດອກໄມ້ຮູບເພັດ

ດ້ານຂອງຮູບປັ້ນພຣະພຸດທະຮູບນັ້ນ ກໍມີຄວາມນູນສູງ, ພຣະອົງຕື້ນັ່ງຖານບົວ ມັດຜົມເປັນກຽວ, ຕິ່ງຫູຍາວ ແລະ ກົ່ງເລັກໜ້ອຍ, ສາຍຕາຈ້ອງມອງທາງລຸ່ມພ້ອມທັງຮອຍຍິ້ມ ອັນເປັນຄຸນລັກສະນະຂອງພຣະພຸດທະເຈົ້າ ໃຜໄດ້ມາຮັບຮອງວ່າຈະຮູ້ສຶກເຖິງຄວາມເປັນປະຫວັດສາດ ແລະ ປະຫວັດອັນຍາວນານ ຂອງວັດນີ້ໄດ້ແນ່ນອນ

ຂໍ້ມູນ: ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຊຽງຂວາງ

#Laos #Xiengkhouang #ລາວທ່ຽວລາວ